Die Skrywers
Erika Nöthnagel
Leonie Katzke
Die reeks het sy oorsprong in die behoefte aan ‘n alternatiewe Afrikaanse eerste-taal program wat kleurvol, interaktief, opwindend en boeiend is, en wat terselfdertyd ‘n hoë standaard handhaaf. Hierdie kombinasie is gebruik om te verseker dat die reeks nie net voldoen aan die vereistes van skoolverlatersertifikate nie, maar dat dit kinders ook voorberei vir ‘n leeftyd van sukses in die tegnologie era waar kreatiwiteit, logiese redenasie en kritiese denke onontbeerlik is!
Die program is ontwikkel deur ‘n dinamiese tuisonderrig ma-en-dogter-span wat die reeks geskryf het vir hul eie kinders en kleinkinders (wat tans die reeks ook self gebruik). Erika Nöthnagel en Leonie Katzke beskik gesamentlik oor 35 jaar ervaring in onderwys en tuisonderrig en het hul passie en ondervinding ingespan om ‘n ware tuisgemaakte, wêreldklas taalprogram te ontwikkel vir alle Afrikaanse tuisskolers.
Leonie beskik oor ‘n BA-graad met Afrikaans, Duits en Sielkunde (Honneurs), ‘n T.H.O.D-diploma en ‘n sertifikaat in Funksionele Terapie. Met dertig jaar se onderwysondervinding by Afrikaanse sowel as Engelse laerskole en hoërskole, asook dubbelmedium spesiale skole, het sy ‘n geweldige passie en insig vir opvoeding deur middel van taal. Tesame met haar ruim ondervinding in die vakgebied, word haar passie vir die Afrikaanse taal innoverend en kleurvol in die blaaie van elke boek uitgebeeld.
Erika het ‘n B.Comm (Informatika) asook ‘n Nasionale Diploma in Bemarking. Omdat sy self al jare lank haar eie kinders tuisonderrig en eerstehands weet dat moedertaalonderrig van kardinale belang is vir enige toekomstige studies en werk, is sy ten volle bewus van watter aspekte benodig word in ‘n eerste-taal program. Sy stap dus die pad saam met ander ouers en bring ‘n praktiese perspektief na die projek om te verseker dat die inhoud relevant en gebruikersvriendelik vir beide ouer en kind is en dat die reeks toeganklik vir die tuisonderrigmark, of enigeen met ‘n hart daarvoor, is.
